Ni feliĉe prezentas al vi la unuan bultenon por Montrealo-2020!
Kanado, Kebekio, Montrealo!
Montrealo gastigis multajn gravajn eventojn: la Tutmondan Ekspozicion en 1967 (“Expo 67”), la somerajn Olimpikojn en 1976 kaj jen, 110 jarojn post la vizito de Zamenhof en 1910, Montrealo iĝos nia monda ĉefurbo per gastigo de la 105-a Universala Kongreso de Esperanto!
Multkultura kaj bonveniga
Kio apartas pri Montrealo? Nu, ĉio! Oni ofte nomas Montrealon la plej eŭropeca urbo en Nordameriko, pro ĝiaj kulturo, arĥitekturo, kutimoj kaj lingvoj. Ĉu vi sciis, ke, post Parizo, Montrealo estas la plej granda urbo en la mondo rilate la nombron da denaskaj parolantoj de la franca? La franca estas la ĉefa lingvo de la urbo kaj de la provinco Kebekio – unika fakto en Nord-Ameriko! La angla estas la dua plej parolata lingvo en Montrealo, sed oni ne povos paŝi eĉ kelkajn metrojn urbocentre sen aŭdi almenaŭ dekon da aliaj lingvoj. Montrealo ja bonvenigis homojn de diversaj etnoj, lingvoj kaj religioj, el ĉiuj anguloj de la mondo, kaj riĉiĝis kulture kaj gastronomie dank’ al siaj novaj loĝantoj. Ankaŭ vi povos konatiĝi kun tiu diverseco promenante tra pluraj etnaj kvartaloj de Montrealo kun famaj, tipe montrealaj, eksteraj kurbŝtuparoj kaj ĝardenetoj. Dumkongrese vi lernos ankaŭ pri diversaj indiĝenaj kulturoj de nia regiono – ege grava parto de nia kanada heredaĵo.
La vorto “Montrealo” devenas de la nomo “Mont Réal” – la “Reĝa Monto”, kiu situas meze de la urbo kaj videblas de pluraj partoj de ĝi. La Reĝa Monto estas la plej granda inter multegaj montrealaj parkoj kaj estas elstara loko por ripozi, sportumi, pikniki kaj fari belegajn fotojn kun vido al la urbo kaj la majesta riverego Sankta-Laŭrenco.
Ni kongresos urbocentre!
Nia kongresejo situos urbocentre, de kie vi povos piediri ĝis la riverego kaj atingi ĉiujn vidindaĵojn en la proksimo piede, metroe, bicikle aŭ buse. Montrealo havas ĉirkaŭ du milionojn da loĝantoj; ĝi estas la dua plej granda urbo en Kanado (post Toronto) kaj proponas al la vizitantoj senlimajn vidindaĵojn, artajn kaj kulturajn programerojn, mondfamajn festivalojn kaj manĝeblojn. Nia urbo estas hejmo de cento da muzeoj, historiaj domoj, artgalerioj, preĝejoj kaj katedraloj. Pli ol dek milionoj da turistoj venas viziti la urbon ĉiujare! Montrealo estas sekura loko, aparte agrabla aŭguste (15-25°C). Ĝi situas proksime al Otavo kaj Kebeko (2-3 horojn for), kaj nemalproksime de Toronto kaj Niagaraj Akvofaloj, Novjorko kaj Bostono.
Bonvenon al Montrealo-2020!
PDF-versio troviĝas plej sube post kiam on alklakas la titolon ĵus sube:
https://esperanto2022.ca/eo/la-unua-bulteno-jam-aperis/